بلوچستان میں 25 کروڑ روپے کا سونا پکڑا گیا، کہاں لے جایا جارہا تھا؟

کوئٹہ: پاکستان کسٹمز انفورسمنٹ کوئٹہ نے بلوچستان کے سرحدی علاقے میں سونے کی اسمگلنگ کی بڑی کوشش ناکام بناتے ہوئے 6.162 کلوگرام سونا ضبط کرلیا، جس کی مالیت تقریباً 25 کروڑ روپے بتائی گئی ہے۔

پاکستان کسٹمز کے مطابق کارروائی ایف ای یو شیلا باغ کے عملے نے خفیہ اطلاع کی بنیاد پر فرنٹیئر کور کے تعاون سے کی، جس کے دوران سونے کے بسکٹ قبضے میں لے لیے گئے۔

کسٹمز حکام کا کہنا ہے کہ مؤثر نگرانی اور انٹیلی جنس معلومات کی بنیاد پر کی گئی کارروائی کے نتیجے میں سونا برآمد ہوا۔ ضبط شدہ سونے کو اسٹیٹ ویئر ہاؤس کوئٹہ منتقل کردیا گیا ہے۔

حکام کے مطابق سونے کی اسمگلنگ کی کوشش پر ایف آئی آر درج کرلی گئی ہے جبکہ معاملے سے متعلق مزید قانونی کارروائی اور تحقیقات جاری ہیں۔

پاکستان کسٹمز کا کہنا ہے کہ بلوچستان میں انسداد اسمگلنگ کی کارروائیاں مزید تیز کردی گئی ہیں جبکہ حساس راستوں اور داخلی و خارجی مقامات پر نگرانی بھی سخت کی جارہی ہے۔

حکام کے مطابق کسٹمز اور فرنٹیئر کور کے درمیان رابطہ کاری اور انٹیلی جنس معلومات کے مؤثر استعمال کے ذریعے غیر قانونی تجارت اور اسمگلنگ کے خلاف کارروائیاں جاری رکھی جائیں گی۔