ٹرمپ نے ایران کی 7 روزہ جنگ بندی کی تجویز مسترد کردی، امریکی اخبار کا دعویٰ

واشنگٹن: امریکی اخبار وال اسٹریٹ جرنل نے دعویٰ کیا ہے کہ صدر ڈونلڈ ٹرمپ نے ایران کی جانب سے پیش کی گئی سات روزہ جنگ بندی کی تجویز مسترد کردی ہے۔

رپورٹ میں امریکی حکام کے حوالے سے بتایا گیا کہ صدر ٹرمپ نے اپنے مشیروں سے کہا ہے کہ نومبر میں ہونے والے امریکی مڈٹرم انتخابات کے بعد ایران پر دوبارہ بمباری کا امکان ہے۔

رپورٹ کے مطابق امریکی صدر کو اس بات پر یقین نہیں کہ تہران واشنگٹن کے مطالبات تسلیم کرے گا۔

ایرانی تجویز میں سات روز کے اندر علاقائی لڑائی روکنے، آبنائے ہرمز دوبارہ کھولنے اور جوہری مذاکرات کی بحالی کی راہ ہموار کرنے کی بات کی گئی تھی۔

دوسری جانب ایران کا کہنا ہے کہ اسے اپنی تجویز پر امریکا کے باضابطہ جواب کا انتظار ہے۔ ایرانی حکام کے مطابق یہ تجویز ثالثوں کے ذریعے واشنگٹن تک پہنچائی گئی ہے۔