سعودی فضائی حملوں میں 30 حوثی جنگجوؤں سمیت 38 ہلاک، حوثیوں کا دعویٰ

صنعا: یمن کے صوبہ تعز میں متعدد فضائی حملوں کے نتیجے میں درجنوں افراد ہلاک ہوگئے، حوثی گروپ نے دعویٰ کیا ہے کہ کارروائیوں میں اس کے تقریباً 30 جنگجو اور 8 شہری مارے گئے۔

حوثیوں سے وابستہ المسیرہ ٹی وی نے سعودی عرب پر حملوں کا الزام عائد کرتے ہوئے کہا کہ تعز کے مویہ چوراہے پر واقع ایک بازار اور متعدد دکانیں بھی نشانہ بنیں۔ حوثیوں کے مطابق زخمیوں میں بچے بھی شامل ہیں۔

دوسری جانب بین الاقوامی سطح پر تسلیم شدہ یمنی حکومت نے کہا ہے کہ اس کی فورسز نے اسی علاقے میں حوثیوں کے ایک فوجی کیمپ اور فوجی گاڑیوں کو نشانہ بنایا۔

حوثی ترجمان یحییٰ سریع نے الزام عائد کیا کہ تعز کے مضافات میں بازار پر دو فضائی حملے کیے گئے جن میں ہلاک اور زخمی ہونے والوں سمیت تقریباً 50 افراد متاثر ہوئے۔ انہوں نے حملوں کا جواب دینے کا بھی اعلان کیا۔

یمنی حکومت کی مسلح افواج کے ترجمان کرنل ماجد عبداللہ النزیلی نے الگ بیان میں دعویٰ کیا کہ گزشتہ 72 گھنٹوں کے دوران سیکڑوں کارروائیاں کی گئیں اور بڑی تعداد میں حوثی جنگجوؤں کو نشانہ بنایا گیا۔

یمن میں جاری لڑائی کے دوران فریقین کی جانب سے ہلاکتوں اور فوجی کارروائیوں کے مختلف اعداد و شمار سامنے آرہے ہیں، جن کی آزاد ذرائع سے فوری طور پر مکمل تصدیق نہیں ہوسکی۔