کراچی کے سپرمارٹ سے 50 لاکھ کا صفایا، خاتون اور ساتھی فرار

کراچی: کلفٹن تین تلوار پر واقع ایک سپرمارٹ سے خاتون اور اس کے ساتھی نے مبینہ طور پر لاکر کھول کر 50 لاکھ روپے سے زائد رقم چوری کرلی اور موقع سے فرار ہوگئے۔

پولیس کے مطابق واردات میں ایک خاتون اور مرد ملوث ہیں، جن کے پاس تالوں کی چابیاں موجود تھیں۔ دونوں ملزمان نے لاکر کھولا اور اس میں موجود 50 لاکھ روپے سے زائد رقم لے کر فرار ہوگئے۔

واقعے کے بعد پولیس نے تحقیقات شروع کردی ہیں جبکہ سی سی ٹی وی فوٹیج کی مدد سے ملزمان کی شناخت اور گرفتاری کی کوششیں جاری ہیں۔

دوسری جانب کلفٹن بلاک 8 میں ڈکیتی کے ایک الگ واقعے میں تین موٹرسائیکلوں پر سوار 7 مسلح ملزمان ایک بیوپاری سے 17 لاکھ روپے لوٹ کر فرار ہوگئے۔