پشتون ثقافت بلوچستان کی پہچان اور طاقت، وزیراعلیٰ سرفراز بگٹی کا پشتون کلچر ڈے پر پیغام

کوئٹہ: وزیراعلیٰ بلوچستان میر سرفراز بگٹی نے پشتون کلچر ڈے کے موقع پر پشتون برادری کو مبارکباد دیتے ہوئے کہا ہے کہ پشتون ثقافت بلوچستان کی تہذیبی شناخت کا اہم اور خوبصورت حصہ ہے۔

وزیراعلیٰ نے اپنے پیغام میں کہا کہ پشتون ثقافت مہمان نوازی، رواداری، بہادری، بھائی چارے اور انسان دوستی جیسی اعلیٰ روایات کی امین ہے۔

میر سرفراز بگٹی نے کہا کہ بلوچستان مختلف اقوام، زبانوں اور ثقافتوں کا حسین امتزاج ہے اور یہی ثقافتی تنوع صوبے کی اصل خوبصورتی اور قوت ہے۔ پشتون برادری نے بلوچستان کی سماجی، ادبی، سیاسی اور معاشی ترقی میں اہم کردار ادا کیا ہے۔

انہوں نے کہا کہ ثقافتی ورثے کا تحفظ نئی نسل کو اپنی تاریخ، اقدار اور شناخت سے جوڑنے کا اہم ذریعہ ہے، جبکہ تمام ثقافتوں، زبانوں اور روایات کا احترام اور ان کا فروغ ہم سب کی مشترکہ ذمہ داری ہے۔

وزیراعلیٰ بلوچستان نے کہا کہ پشتون کلچر ڈے امن، بھائی چارے، باہمی احترام اور رواداری کے فروغ کا پیغام دیتا ہے۔