نوشکی میں پولیو ٹیم کی سکیورٹی پر حملہ، 2 پولیس اہلکار شہید

نوشکی: کلی جمال آباد کے مقام پر نامعلوم مسلح افراد نے پولیو ٹیم کی سکیورٹی پر مامور پولیس اہلکاروں پر فائرنگ کردی، جس کے نتیجے میں دو پولیس اہلکار محمد یاسر اور عبدالراوف شہید ہوگئے۔

پولیس ذرائع کے مطابق مسلح افراد نے پولیو ٹیم کی حفاظت پر تعینات اہلکاروں کو نشانہ بنایا اور فائرنگ کے بعد موقع سے فرار ہوگئے۔

ذرائع کا کہنا ہے کہ حملہ آور شہید پولیس اہلکاروں کا سرکاری اسلحہ بھی اپنے ساتھ لے گئے۔

واقعے کے بعد پولیس کی بھاری نفری موقع پر پہنچ گئی، علاقے کو گھیرے میں لے کر حملہ آوروں کی تلاش شروع کردی گئی ہے جبکہ واقعے سے متعلق مزید تحقیقات جاری ہیں۔