فیلڈ مارشل عاصم منیر سے اہم ملاقات، لبنان نے پاکستان کا کردار سراہا

راولپنڈی: لبنان کے وزیر داخلہ احمد الحجار نے فیلڈ مارشل سید عاصم منیر سے ملاقات کی، جس میں باہمی دلچسپی کے امور، خطے کی موجودہ سیکیورٹی صورتحال اور دونوں ممالک کے درمیان تعاون کے فروغ پر تبادلہ خیال کیا گیا۔

ملاقات کے دوران لبنانی وزیر داخلہ نے خطے میں امن و استحکام کے قیام کے لیے پاکستان کی جانب سے کی جانے والی کوششوں کو سراہتے ہوئے اس کے مثبت کردار کی تعریف کی۔

دونوں جانب سے پاکستان اور لبنان کے درمیان دیرینہ برادرانہ تعلقات پر اطمینان کا اظہار کیا گیا اور بالخصوص سیکیورٹی کے شعبے میں باہمی تعاون کو مزید مضبوط بنانے کی ضرورت پر زور دیا گیا۔

فیلڈ مارشل عاصم منیر نے لبنان کے امن، استحکام اور سلامتی کے لیے پاکستان کی حمایت کا اعادہ کرتے ہوئے دونوں برادر ممالک کے درمیان تعلقات کو مزید وسعت دینے کے عزم کا اظہار کیا۔

ملاقات میں خطے میں پائیدار امن کے قیام اور باہمی تعاون کو مزید مؤثر بنانے کے حوالے سے بھی خیالات کا تبادلہ کیا گیا۔