اسکولوں کے اوقات میں ایک گھنٹے کی کمی کا اعلان

سندھ کے وزیر تعلیم سردار شاہ نے سرکاری اسکولوں کے اوقات کار میں ایک گھنٹے کی کمی کرنے کا اعلان کر دیا ہے

کراچی میں ایک تقریب سے خطاب کرتے ہوئے سردار شاہ نے بتایا کہ صوبے میں تعلیم کے حوالے سے یکساں پالیسی تشکیل دینے میں کامیابی نہیں مل سکی، جبکہ اسکولوں سے باہر موجود بچوں کی بڑی تعداد اب بھی ایک سنگین چیلنج بنی ہوئی ہے۔ انہوں نے نشاندہی کی کہ حالیہ سیلاب کے دوران تقریباً 20 ہزار اسکولوں کی چار دیواری متاثر ہوئی ہے، جن کی بحالی کے لیے مزید وسائل کی ضرورت ہے۔

سردار شاہ نے اس بات پر بھی روشنی ڈالی کہ پاکستان دنیا کے ان ممالک میں شامل ہے جہاں تعلیم کے شعبے پر انتہائی کم اخراجات کیے جاتے ہیں۔ انہوں نے وفاقی حکومت سے مطالبہ کیا کہ پبلک سیکٹر ڈویلپمنٹ پروگرام (PSDP) کے ذریعے تعلیمی مراکز کے لیے مناسب فنڈز مختص کیے جائیں تاکہ سہولیات بہتر کی جا سکیں۔ انہوں نے مزید بتایا کہ بڑی تعداد میں بچوں کو کمیونٹی بیسڈ تعلیمی مراکز کے ذریعے تعلیم دی جا رہی ہے، تاہم مہنگائی میں مسلسل اضافے کی وجہ سے ان مراکز کو چلانے کے اخراجات بھی بڑھ چکے ہیں، جس سے مالی مشکلات میں اضافہ ہو گیا ہے۔