وزیراعلیٰ بلوچستان کا کرپٹ وزراء اور سیکرٹریز کے خلاف انتہائی خوفناک اعلان
وزیراعلیٰ بلوچستان میر سرفراز بگٹی نے دوٹوک الفاظ میں اعلان کیا ہے کہ صوبے میں کسی بھی نوجوان کی نوکری ہرگز فروخت نہیں ہونے دی جائے گی اور نوکریوں کی خرید و فروخت ثابت ہونے پر متعلقہ وزیر اور سیکرٹری کو بھی عہدے پر رہنے کا کوئی حق نہیں ہوگا۔
سیکرٹریز کمیٹی کے اہم اجلاس کی صدارت کرتے ہوئے وزیراعلیٰ نے تمام سیکرٹریز سے اللہ کو حاضر و ناظر جان کر حلف لیا کہ وہ غریب اور مستحق نوجوانوں کے حقوق پر ڈاکا نہیں پڑنے دیں گے۔ انہوں نے واضح کیا کہ روزِ اول سے ان کا یہ مؤقف ہے کہ کوئی نوکری نہیں بکے گی اور اس معاملے پر کابینہ ارکان اور چیف سیکرٹری سمیت تمام متعلقہ حکام ایک ہی پیج پر ہیں۔
اجلاس کے دوران محکمہ جنگلات میں بھرتیوں کے حوالے سے موصول ہونے والی بے ضابطگیوں کی شکایات پر فوری نوٹس لیتے ہوئے وزیراعلیٰ نے اعلیٰ سطحی تحقیقات کا حکم دیا اور تنبیہ کی کہ جرم ثابت ہونے پر کوئی کردار بچ نہیں پائے گا۔ انہوں نے افسران کو ہدایت کی کہ ریکروٹمنٹ کمیٹیوں پر کڑی نظر رکھی جائے کیونکہ نوجوانوں کے حقوق اور میرٹ پر کسی قسم کا کوئی سمجھوتہ نہیں کیا جائے گا۔