سونے کی قیمت میں مزید کمی

عالمی اور مقامی مارکیٹ میں سونے کی قیمت میں مسلسل دوسرے روز بھی کمی ریکارڈ کی گئی ہے۔

آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت میں ایک ہزار روپے کمی کے بعد نئی قیمت 4 لاکھ 26 ہزار 436 روپے ہو گئی ہے۔

اسی طرح 10 گرام سونا 857 روپے سستا ہو کر 3 لاکھ 65 ہزار 600 روپے کا ہو گیا، جبکہ مقامی مارکیٹ میں فی تولہ چاندی کی قیمت میں بھی 68 روپے کمی ہوئی، جس کے بعد چاندی 6 ہزار 291 روپے فی تولہ پر آ گئی۔

گزشتہ روز بھی سونے کی قیمت میں نمایاں کمی دیکھی گئی تھی، جب فی تولہ سونا 4 ہزار 300 روپے سستا ہو کر 4 لاکھ 27 ہزار 436 روپے جبکہ 10 گرام سونا 3 ہزار 687 روپے کمی کے بعد 3 لاکھ 66 ہزار 457 روپے کا ہو گیا تھا۔

عالمی مارکیٹ میں بھی سونے کی قیمت 10 ڈالر کمی کے بعد 4 ہزار 40 ڈالر فی اونس ریکارڈ کی گئی۔

ماہرین کے مطابق عالمی مارکیٹ میں سونے کی قیمتوں میں کمی، ڈالر کی قدر میں اتار چڑھاؤ اور سرمایہ کاروں کے بدلتے رجحانات کے باعث مقامی مارکیٹ میں بھی قیمتیں کم ہوئی ہیں۔

صرافہ ڈیلرز کا کہنا ہے کہ حالیہ کمی کے بعد زیورات خریدنے والے افراد کی دلچسپی میں اضافہ ہو سکتا ہے، تاہم قیمتوں میں مسلسل تبدیلی کے باعث سرمایہ کار محتاط رویہ اختیار کر رہے ہیں۔

ماہرین کے مطابق اگر عالمی مارکیٹ میں کمی کا رجحان برقرار رہا تو آئندہ دنوں میں سونے کی قیمتوں میں مزید کمی یا استحکام دیکھنے کو مل سکتا ہے، تاہم عالمی معاشی اور سیاسی صورتحال قیمتوں پر اثر انداز ہو سکتی ہے۔