کوئٹہ والوں کے لیے بڑی خوشخبری
کوئٹہ والوں کے لیے بڑی خوشخبری
کوئٹہ کے باسیوں کو سستی اور آرام دہ سفری سہولت فراہم کرنے کے لیے سریاب ریلوے اسٹیشن سے کچلاک تک ‘پیپلز ٹرین سروس’ کے آغاز کی تیاریاں آخری مراحل میں داخل ہو گئی ہیں۔ ریلوے حکام کا کہنا ہے کہ اس اہم منصوبے کے لیے نئی اور جدید بوگیوں کا ماڈل مکمل طور پر تیار کر لیا گیا ہے اور یہ بوگیاں بہت جلد کوئٹہ پہنچ جائیں گی۔
ذرائع کے مطابق حکومتِ بلوچستان کے تعاون سے شروع کیے جانے والے اس منصوبے کا باقاعدہ افتتاح جلد متوقع ہے۔ نئی بوگیوں کی کوئٹہ آمد کے فوراً بعد ایک شاندار افتتاحی تقریب منعقد کی جائے گی، جس کے ساتھ ہی ٹرین کو باقاعدہ طور پر عوام کے لیے چلا دیا جائے گا۔
ریلوے حکام نے امید ظاہر کی ہے کہ اس ٹرین سروس کے شروع ہونے سے نہ صرف کوئٹہ بلکہ اس کے نواحی علاقوں کے شہریوں کو بھی ایک محفوظ، معیاری اور سستا سفری متبادل میسر آئے گا۔ خاص طور پر وہ ملازمین اور طلبہ جو روزانہ سریاب سے کچلاک کے درمیان سفر کرتے ہیں، انہیں اس منصوبے سے بہت بڑی راحت ملے گی۔