بلوچستان میں یکے بعد دیگرے 2 بسوں پر ہولناک فائرنگ،4 مسافر جاں بحق
بلوچستان میں شاہراہوں پر بدامنی کی شدید لہر کے دوران مستونگ اور قلات کے علاقوں میں یکے بعد دیگرے مسافر کوچز پر مسلح افراد کی جانب سے اندھا دھند فائرنگ کے دو ہولناک واقعات پیش آئے ہیں، جن کے نتیجے میں 4 افراد جاں بحق ہو گئے۔
مستونگ واقعہ:
ذرائع کے مطابق پہلا خونریز واقعہ مستونگ کے نواحی علاقے میں پیش آیا، جہاں سڑک کنارے پہلے سے گھات لگائے نامعلوم مسلح افراد نے ایک مسافر کوچ پر اچانک اندھا دھند فائرنگ کر دی۔ گولیوں کی زد میں آ کر 4 مسافر موقع پر ہی جاں بحق ہو گئے۔ حملہ آور واقعے کے فوراً بعد تاریکی اور پہاڑی راستوں کا فائدہ اٹھاتے ہوئے موقع سے فرار ہو گئے۔
متعلقہ پوسٹس
قلات واقعہ:
دوسری جانب، ضلع قلات میں گڈان ہوٹل کے قریب بدامنی کا ایک اور سنگین واقعہ سامنے آیا، جہاں کوئٹہ سے تربت جانے والی “المنیر” مسافر کوچ کو شاہراہ پر نشانہ بنایا گیا۔ مسلح افراد نے مقررہ روٹ پر گامزن بس پر فائرنگ کی، جس کے باعث کوچ کے اندر سوار مسافروں میں شدید خوف و ہراس اور چیخ و پکار مچ گئی۔
دونوں واقعات کی اطلاع ملتے ہی لیویز، پولیس، سکیورٹی فورسز اور ریسکیو ٹیمیں فوری طور پر جائے وقوعہ پر پہنچ گئیں۔ فورسز نے تمام اطراف کی ناکہ بندی کر کے علاقوں کو گھیرے میں لے لیا اور شواہد اکٹھے کرنے کے ساتھ ساتھ جاں بحق افراد کی لاشوں کو قریبی ہسپتالوں میں منتقل کر دیا ہے۔ حکام کا کہنا ہے کہ دونوں واقعات کی اعلیٰ سطحی تحقیقات کا آغاز کر دیا گیا ہے اور فرار ہونے والے مسلح حملہ آوروں کی گرفتاری کے لیے وسیع پیمانے پر مشترکہ سرچ آپریشن جاری ہے۔