ہنہ اوڑک واقعے پر وزیر داخلہ کا فوری دورہ، احتجاجی عمائدین سے مذاکرات مکمل
کوئٹہ: ہنہ اوڑک میں مسلح افراد کے حملے کے بعد پیدا ہونے والی صورتحال پر صوبائی وزیر داخلہ میر ضیاء اللہ لانگو نے فوری نوٹس لیتے ہوئے ہنہ اوڑک اور ائیرپورٹ کا دورہ کیا۔ اس موقع پر انہوں نے واقعے کے خلاف احتجاج کرنے والے شرکاء اور مقامی قبائلی عمائدین سے تفصیلی بات چیت اور مذاکرات کیے۔
وزیر داخلہ بلوچستان نے حملے میں مقامی قبائل کے افراد کی شہادت پر گہرے دکھ اور افسوس کا اظہار کرتے ہوئے لواحقین سے تعزیت کی۔
میڈیا اور قبائلی عمائدین سے گفتگو کرتے ہوئے میر ضیاء اللہ لانگو کا کہنا تھا:
متعلقہ پوسٹس
“حکومتِ بلوچستان اس مشکل گھڑی میں مقامی قبائل کے ساتھ مکمل یکجہتی کا اظہار کرتی ہے۔ ہماری حکومت مظلوم کے ساتھ اور ظالم کے خلاف سیسہ پلائی دیوار کی طرح کھڑی ہے۔”
انہوں نے یقین دہانی کرائی کہ واقعے میں ملوث عناصر کو قانون کے کٹہرے میں لانے کے لیے تمام وسائل بروئے کار لائے جائیں گے اور علاقے میں امن و امان کے قیام کو ہر صورت یقینی بنایا جائے گا۔