کوئٹہ میں موبائل انٹرنیٹ سروس ایک بار پھر معطل
کوئٹہ: صوبائی دارالحکومت کوئٹہ کے بیشتر علاقوں میں موبائل انٹرنیٹ سروس ایک بار پھر معطل کر دی گئی ہے، جس کے باعث شہریوں کو آن لائن سہولیات کے استعمال میں مشکلات کا سامنا ہے۔
ذرائع کے مطابق موبائل ڈیٹا سروس کی بندش سیکیورٹی خدشات کے پیش نظر کی گئی ہے۔ شہر کے مختلف علاقوں میں 3G اور 4G سروس متاثر ہونے سے واٹس ایپ، فیس بک اور دیگر آن لائن پلیٹ فارمز تک رسائی میں دشواری پیش آ رہی ہے۔
حکام کے مطابق انٹرنیٹ سروس کی بندش عارضی ہے اور امن و امان کی صورتحال بہتر ہوتے ہی اسے بحال کر دیا جائے گا۔ حکام کا کہنا ہے کہ شہریوں کی جان و مال کا تحفظ اولین ترجیح ہے۔
متعلقہ پوسٹس
دوسری جانب شہریوں، طلبہ اور آن لائن کاروبار سے وابستہ افراد نے اچانک انٹرنیٹ بند کیے جانے پر تشویش کا اظہار کرتے ہوئے مطالبہ کیا ہے کہ ایسی صورتحال میں عوام کو بروقت آگاہ کیا جائے تاکہ وہ متبادل انتظامات کر سکیں۔
انتظامیہ نے یقین دہانی کرائی ہے کہ حالات معمول پر آتے ہی موبائل انٹرنیٹ سروس بحال کر دی جائے گی۔