اسٹاک مارکیٹ میں وہ ہوا جو کسی کے وہم و گمان میں بھی نہ تھا

اسٹاک مارکیٹ میں وہ ہوا جو کسی کے وہم و گمان میں بھی نہ تھا

کراچی: پاکستان اسٹاک ایکسچینج میں منگل کی صبح کاروبار کا آغاز زبردست تیزی اور تیزی سے بڑھتے ہوئے رجحان کے ساتھ ہوا۔ بینچ مارک KSE-100 انڈیکس ابتدائی 35 منٹ کے دوران 643.38 پوائنٹس کی نمایاں چھلانگ لگا کر 177,610.06 کی تاریخی سطح پر پہنچ گیا، جو گزشتہ کاروباری روز کی نسبت 0.36 فیصد اضافے کو ظاہر کرتا ہے۔

معاشی ماہرین کے مطابق مارکیٹ میں اس غیر معمولی تیزی کا بنیادی سبب عالمی ریٹنگ ایجنسی موڈیز (Moody’s) کی جانب سے پاکستان کی کریڈٹ ریٹنگ Caa1 سے بہتر کر کے B3 کرنا اور آؤٹ لک کو مستحکم برقرار رکھنا ہے۔ اس مثبت پیشرفت کے باعث آٹو موبائل، سیمنٹ، بینکنگ، پاور، آئل اینڈ گیس ایکسپلوریشن اور آئل مارکیٹنگ کے شعبوں میں سرمائے کا زبردست بہاؤ دیکھا گیا۔ حبکو، ماری پیٹرولیم، OGDC، PPL، PSO، اور میزان بینک جیسے بڑے حصص میں خریداروں کی شدید دلچسپی کے باعث انڈیکس مسلسل مثبت زون میں برقرار رہا۔

یاد رہے کہ گزشتہ روز پیر کے دن ابتدائی تیزی کے بعد پرافٹ ٹیکنگ کے باعث انڈیکس 199.84 پوائنٹس کی کمی پر بند ہوا تھا، تاہم منگل کو عالمی منڈیوں میں ایشیائی اسٹاکس کی مندی اور تیل کی قیمتوں میں کمی کے باوجود پاکستانی مارکیٹ نے موڈیز کی ریٹنگ میں بہتری کا اثر قبول کرتے ہوئے بہترین کارکردگی کا مظاہرہ کیا۔