منرل واٹر پینے والوں کے لیے بری خبر
متعلقہ پوسٹس
اسلام آباد: پاکستان کونسل برائے تحقیقاتِ آبی وسائل (PCRWR) کی جانب سے جاری کردہ اپریل تا جون 2026 کی سہ ماہی رپورٹ میں ایک چونکا دینے والا انکشاف سامنے آیا ہے۔ حکومتِ پاکستان کی ہدایت پر 20 شہروں سے بوتل بند پانی کے 230 مختلف برانڈز کے نمونے حاصل کیے گئے تھے، جن میں سے لیبارٹری تجزیے کے بعد 29 برانڈز کو پینے کے لیے مکمل طور پر غیر معیاری اور مضرِ صحت قرار دے دیا گیا ہے۔
رپورٹ کے مطابق، ان 29 غیر معیاری برانڈز میں سے 22 میں جراثیموں کی آلودگی پائی گئی ہے، جبکہ 9 برانڈز میں سوڈیم اور 4 برانڈز میں ٹی ڈی ایس (TDS) کی مقدار مقررہ حد سے زیادہ ملی ہے۔ دوسری جانب، متعلقہ کمپنیوں کے ترجمانوں نے اس رپورٹ پر ردعمل دیتے ہوئے دعویٰ کیا ہے کہ ان کا پانی معیاری ہے اور وہ اس سلسلے میں حکومت سے رجوع کر کے ریکارڈ درست کروائیں گے۔