لندن: انگلینڈ کے معروف فٹبالر ہیری کین نے بیلن ڈی اور ایوارڈ جیتنے پر بھارتی کرکٹ اسٹار ویرات کوہلی کی جانب سے ملنے والی مبارکباد کو اپنے لیے خاص قرار دیا ہے۔
ایک پریس کانفرنس کے دوران ہیری کین سے پوچھا گیا کہ ایوارڈ جیتنے کے بعد موصول ہونے والے مبارکبادی پیغامات میں کون سا پیغام ان کے لیے سب سے زیادہ حیران کن تھا۔
جواب میں ہیری کین نے سابق انگلش فٹبالر ڈیوڈ بیکہم، امریکی فٹبال اسٹار ٹام بریڈی اور بھارتی کرکٹر ویرات کوہلی کا ذکر کیا۔
ہیری کین نے کہا کہ ڈیوڈ بیکہم ان کے آئیڈیل رہے ہیں، جبکہ وہ ویرات کوہلی اور ٹام بریڈی سمیت متعدد کھلاڑیوں کی بے حد عزت کرتے ہیں۔
انگلش فٹبالر کے مطابق انہیں مختلف شعبوں سے تعلق رکھنے والی معروف شخصیات کے بڑی تعداد میں مبارکبادی پیغامات موصول ہوئے، جن پر وہ سب کے شکر گزار ہیں۔
واضح رہے کہ ویرات کوہلی نے ہیری کین کو بیلن ڈی اور ایوارڈ جیتنے پر سوشل میڈیا پلیٹ فارم ایکس کے ذریعے مبارکباد دی تھی۔
اپنے پیغام میں کوہلی نے ہیری کین کی مسلسل محنت، ثابت قدمی اور دیانت داری کو سراہتے ہوئے کہا تھا کہ وہ اس اعزاز کے مکمل طور پر حق دار ہیں۔
ویرات کوہلی نے ہیری کین اور ان کے اہلِ خانہ کے لیے نیک خواہشات کا اظہار بھی کیا تھا۔
یاد رہے کہ ہیری کین نے 26 اکتوبر کو بیلن ڈی اور 2026 کا اعزاز حاصل کیا تھا۔ وہ 25 سال بعد یہ ایوارڈ جیتنے والے پہلے انگلش فٹبالر بنے ہیں۔