بارکھان اور رکھنی میں 79واں یومِ آزادی شاندار انداز میں منایا گیا؛ قومی پرچم کشائی اور شجرکاری مہم کا آغاز
بارکھان اور رکھنی میں 79واں یومِ آزادی شاندار انداز میں منایا گیا؛ قومی پرچم کشائی اور شجرکاری مہم کا آغاز
بارکھان اور رکھنی میں پاکستان کا 79واں یومِ آزادی بھرپور ملی جوش و جذبے، وقار اور شاندار انداز میں منایا گیا۔ اس موقع پر منعقدہ مرکزی اور پروقار تقریب میں کمشنر کوہِ سلیمان ڈویژن مجیب الرحمٰن قمبرانی نے قومی پرچم لہرایا، جبکہ پولیس کے چاک و چوبند دستے نے پرچم کو سلامی پیش کی۔
تقریب کا باقاعدہ آغاز قومی ترانے سے ہوا، جس میں ڈی آئی جی کوہِ سلیمان رینج ایاز احمد بلوچ، ایڈیشنل کمشنر عبدالباسط بزدار، ضلعی افسران، قبائلی عمائدین اور شہریوں کی بڑی تعداد نے شرکت کی۔
متعلقہ پوسٹس
شجرکاری مہم اور ملک کی سلامتی کے لیے دعائیں
یومِ آزادی کی مناسبت سے کمشنر مجیب الرحمٰن قمبرانی اور ڈی آئی جی ایاز احمد بلوچ نے پودا لگا کر خصوصی شجرکاری مہم کا بھی افتتاح کیا۔ تقریب کے اختتام پر ملک کی سلامتی، ترقی، خوشحالی اور استحکام کے لیے خصوصی دعائیں مانگی گئیں، جس کے بعد افسران نے جشنِ آزادی کا کیک کاٹا۔ اس موقع پر فضا “پاکستان زندہ باد” کے فلک شگاف نعروں سے گونج اٹھی۔
تقریب سے خطاب کرتے ہوئے کمشنر مجیب الرحمٰن قمبرانی کا کہنا تھا:“آزادی ایک عظیم نعمت ہے، جس کی حفاظت اور ملکی ترقی میں ہر شہری کو اپنا مثبت کردار ادا کرنا چاہیے۔ پاکستان کی آزادی ہمارے اسلاف کی لازوال قربانیوں کا نتیجہ ہے، لہٰذا ہمیں قومی اتحاد، یکجہتی اور باہمی بھائی چارے کو فروغ دینا ہوگا۔”
یہ پروقار تقریب وطن سے محبت، قومی یکجہتی اور ایک سرسبز و خوشحال پاکستان کے عزم کی عکاس ثابت ہوئی، جہاں تمام شرکاء نے ملک کی بہتری اور ترقی کے لیے مل کر کام کرنے کے عزم کا اعادہ کیا۔
