دہشت گردوں کا سیکیورٹی اسکواڈ پر حملہ، فائرنگ کے تبادلے سے علاقے میں شدید خوف و ہراس
قلات سے کوئٹہ روانگی کے دوران وزیر داخلہ بلوچستان، میر ضیاء اللہ لانگو کے سیکیورٹی اسکواڈ پر مسلح افراد نے اچانک فائرنگ کر دی۔ ذرائع کے مطابق فائرنگ کے اس شدید واقعے میں وزیر داخلہ میر ضیاء اللہ لانگو معجزانہ طور پر بال بال بچے اور مکمل محفوظ رہے۔
حملے کے دوران پولیس اور سیکیورٹی فورسز کی جانب سے فوری جوابی فائرنگ کی گئی، تاہم فائرنگ کے تبادلے میں اینٹی ٹیررازم فورس (ATF) کے 03 اہلکار (نصر اللہ، سمیع اللہ اور زکریا) شدید زخمی ہو گئے۔
واقعے کے فوراً بعد تمام زخمی اہلکاروں کو نواب غوث بخش ہسپتال مستونگ منتقل کیا گیا جہاں انہیں ابتدائی طبی امداد فراہم کی گئی، جس کے بعد انہیں مزید علاج کے لیے کوئٹہ منتقل کر دیا گیا ہے۔ ذرائع کے مطابق تمام زخمی اہلکاروں کی حالت اب مستحکم اور خطرے سے باہر بتائی جا رہی ہے۔