آٹے کی قیمتوں میں بڑی کمی
کراچی انتظامیہ نے مہنگائی کے ستائے عوام کو بڑا ریلیف فراہم کرتے ہوئے آٹے کی ایکس مل قیمت میں کمی کا شاندار اعلان کر دیا ہے۔ نئی سرکاری سطح کے مطابق آٹے کی قیمت 133 روپے سے کم کر کے 130 روپے فی کلو مقرر کر دی گئی ہے۔
یہ اہم فیصلہ کمشنر کراچی سید حسن نقوی کی زیرِ صدارت ہونے والے ایک اعلیٰ سطحی اجلاس میں کیا گیا۔ اجلاس میں فلور ملز کے نمائندوں، محکمہ خوراک کے افسران اور دیگر متعلقہ حکام نے شرکت کی، جہاں گندم کی دستیابی، آٹے کی پیداوار، مارکیٹ سپلائی اور قیمتوں کے حوالے سے تفصیلی جائزہ لیا گیا۔
متعلقہ پوسٹس
حکام نے بریفنگ دیتے ہوئے بتایا کہ اندرون سندھ سے کراچی کو گندم کی سپلائی میں بہتری آئی ہے، جس کی بدولت آٹے کی قیمتوں میں کمی لانے کی گنجائش پیدا ہوئی۔ کمشنر کراچی نے شہریوں کو مزید خوشخبری سناتے ہوئے کہا کہ اگر گندم کی ترسیل کا موجودہ رجحان برقرار رہا تو آنے والے دنوں میں عوام کو مزید ریلیف دیا جائے گا اور انتظامیہ آٹے کی ایکس مل قیمت کم کر کے 125 روپے فی کلو تک لانے پر بھی غور کر رہی ہے۔
اجلاس میں شہر بھر میں آٹے کی بلا تعطل فراہمی کو یقینی بنانے پر زور دیا گیا اور واضح وارننگ دی گئی کہ آٹے کی مصنوعی قلت اور منافع خوری کو کسی صورت برداشت نہیں کیا جائے گا۔ متعلقہ حکام کو ہدایت کی گئی ہے کہ وہ مارکیٹ میں نظر رکھیں تاکہ سرکاری قیمتوں کا براہِ راست فائدہ عوام تک پہنچے اور نئی قیمتوں کی خلاف ورزی کرنے والوں کے خلاف سخت ترین قانونی کارروائی عمل میں لائی جائے۔