قومی شاہراہوں کی سیکیورٹی کے لیے بڑا ایکشن پلان تیار
صوبائی وزیرِ داخلہ میر ضیاء اللہ لانگو نے ایک تہلکہ خیز انکشاف کرتے ہوئے کہا ہے کہ بلوچستان میں دہشت گردی کے لیے افغانستان کی سرزمین استعمال ہو رہی ہے۔
یہ بات انہوں نے کوئٹہ میں بلوچستان ٹریڈرز ایسوسی ایشن کے مرکزی صدر رحیم آغا کی قیادت میں تاجر برادری کے ساتھ ہونے والے ایک اہم مشاورتی اجلاس کے دوران کہی۔ اس اعلیٰ سطحی اجلاس میں وزیرِ داخلہ کے معاونِ خصوصی بابر یوسفزئی اور ڈپٹی کمشنر کوئٹہ نے بھی خصوصی شرکت کی۔
اجلاس سے خطاب کرتے ہوئے میر ضیاء اللہ لانگو نے واضح کیا کہ پرامن احتجاج ہر شہری کا بنیادی اور جمہوری حق ہے۔ تاہم، انہوں نے سرحد پار سے ہونے والی دہشت گردی پر شدید تحفظات کا اظہار کیا۔ ان کا کہنا تھا کہ بے گناہ نوجوانوں اور خواتین کی ٹارگٹ کلنگ ہماری مقامی اور قبائلی روایات کے بالکل برعکس ہے۔ انہوں نے الزام عائد کیا کہ مٹھی بھر شرپسند عناصر دشمن ممالک کے اشارے پر صوبے میں بدامنی اور خوف و ہراس پھیلا رہے ہیں۔
متعلقہ پوسٹس
وزیرِ داخلہ نے تاجر برادری کو مکمل یقین دہانی کروائی کہ ان کے تمام مسائل مشترکہ کاوشوں سے حل کیے جائیں گے۔ ہڑتال کے حق کو تسلیم کرتے ہوئے انہوں نے زور دیا کہ عوامی شکایات کا ازالہ کرنا حکومت کی اولین ذمہ داری ہے۔ انہوں نے اعلان کیا کہ قومی شاہراہوں کو محفوظ بنانے کے لیے ہنگامی بنیادوں پر اقدامات کیے جا رہے ہیں جبکہ کل تاجروں کے ساتھ مذاکرات کا ایک اور دور ہوگا جس میں حکومت بھرپور تعاون کرے گی۔
دوسری جانب، تاجر رہنما رحیم آغا نے اجلاس میں تاجر برادری کے شدید تحفظات اور خدشات پیش کیے۔ انہوں نے بالخصوص قومی شاہراہوں پر مال بردار ٹرکوں کو نذرِ آتش کیے جانے کے بڑھتے ہوئے واقعات اور میٹروپولیٹن کارپوریشن سے جڑے دیگر سنگین مسائل پر حکومت سے فوری اور مؤثر ایکشن لینے کا مطالبہ کیا۔