نیب بلوچستان کی جانب سے شکایات کنندگان کیلئے کھلی کچہری کا انعقاد
کوئٹہ: قومی احتساب بیورو (نیب) بلوچستان کی جانب سے صوبے میں مالی بدعنوانیوں سے متعلق شکایات کے اندراج اور عوامی مسائل کے حل کیلئے کھلی کچہری کا انعقاد کیا جا رہا ہے۔
نیب بلوچستان کے مطابق چیئرمین نیب کی ہدایات پر ہر ماہ کی آخری جمعرات کو کھلی کچہری منعقد کی جاتی ہے، جس میں ڈائریکٹر جنرل نیب بلوچستان شکایت کنندگان سے براہِ راست ملاقات کرکے ان کی شکایات سنتے ہیں۔
اس ماہ کھلی کچہری 27 اگست 2026 بروز جمعرات صبح 11 بجے سے دوپہر 1 بجے تک نیب بلوچستان کے دفتر واقع شاہراہ گلستان، کوئٹہ کینٹ میں منعقد ہوگی۔
نیب حکام نے شکایت کنندگان سے اپیل کی ہے کہ وہ تحریری شکایت کے ساتھ درج ذیل معلومات لازمی فراہم کریں:
نام بمعہ ولدیت
قومی شناختی کارڈ کی کاپی
مکمل پتہ
متعلقہ پوسٹس
دستخط یا نشانِ انگوٹھا
موبائل نمبر، گھر کا رابطہ نمبر یا ای میل
نیب بلوچستان نے واضح کیا ہے کہ چیئرمین نیب کی ہدایات کے مطابق اب گمنام یا فرضی شکایات پر کارروائی نہیں کی جائے گی۔ صرف ایسی مصدقہ شکایات پر قانون کے مطابق کارروائی کی جائے گی جو نیب کے دائرہ اختیار میں آتی ہوں۔
حکام کے مطابق کسی بھی شکایت پر کارروائی سے قبل شکایت کنندہ سے اسٹامپ پیپر پر بیانِ حلفی بھی لیا جائے گا۔
عوام شکایات درج کرانے کیلئے نیب بلوچستان دفتر، شاہراہ گلستان کوئٹہ کینٹ، بذریعہ ای میل balochistan@nab.gov.pk یا نیب شکایات دفتر واقع ڈی سی آفس، انسکمب روڈ کوئٹہ میں رابطہ کر سکتے ہیں۔
مزید معلومات کیلئے نیب بلوچستان کے فون نمبرز 081-9203614 اور 081-9203468 پر رابطہ کیا جا سکتا ہے۔