زیارت اور پشین کی شاہراہ پر مسلح افراد کا حملہ
بلوچستان میں امن و امان کی صورتحال کے حوالے سے ایک اور تشویشناک واقعہ سامنے آیا ہے، جہاں زیارت کے علاقے ‘کچھ’ اور پشین کے علاقے ‘خانائی بابا’ کے درمیان نامعلوم مسلح افراد نے کوئٹہ جانے والی مرکزی شاہراہ پر رات کے اندھیرے میں ناکہ بندی کر کے فائرنگ کر دی، جس کے نتیجے میں دو افراد موقع پر ہی جاں بحق اور ایک شدید زخمی ہو گیا۔
مقامی ذرائع کے مطابق، سنجاوی کے رہائشی ۶ افراد تین موٹر سائیکلوں پر سوار ہو کر کوئٹہ جا رہے تھے کہ مسلح افراد نے انہیں زبردستی روکنے کی کوشش کی۔ موٹر سائیکل سواروں کی جانب سے نہ رکنے پر حملہ آوروں نے اندھا دھند فائرنگ کر دی۔
شہداء کی شناخت: فائرنگ کے نتیجے میں احسان اللہ اور محمد یونس موقع پر ہی دم توڑ گئے۔ دونوں کا تعلق سنجاوی سے تھا۔
متعلقہ پوسٹس
زخمی اور لاپتہ افراد: ایک زخمی شخص نے اپنے ایک ساتھی کے ساتھ تیز رفتاری سے موٹر سائیکل بھگا کر جان بچائی، جبکہ قافلے میں شامل دیگر ۲ افراد تاحال لاپتہ ہیں جن کے حوالے سے ان کے اہل خانہ شدید تشویش میں مبتلا ہیں۔
جاں بحق ہونے والے دونوں افراد کی نمازِ جنازہ ان کے آبائی علاقے سنجاوی میں ادا کر دی گئی ہے، جہاں ہر آنکھ اشکبار تھی۔ دوسری جانب واقعے کے بعد پشین اور زیارت پولیس کے درمیان حد بندی کا تنازع کھڑا ہو گیا ہے اور دونوں اضلاع کی پولیس تاحال واقعے کے دقیق مقام کی حدود کا تعین نہیں کر سکی ہے۔
واضح رہے کہ زیارت کے اسی علاقے ‘کچھ’ میں رواں برس ۶ جولائی کو کالعدم تحریک طالبان پاکستان (TTP) کے حملے میں ۳۰ پولیس اہلکار شہید ہو گئے تھے، جس کے بعد شہداء کے لواحقین نے مسلح گروہوں کے قلع قمع کے لیے طویل احتجاجی دھرنا بھی دیا تھا۔ حالیہ واقعے نے ایک بار پھر علاقے کے شہریوں میں شدید خوف و ہراس اور امن و امان پر سنگین سوالات کھڑے کر دیے ہیں۔