ملازمین کے لیے بڑی خبر،اب ہر ماہ کس تاریخ کو ملے گی؟
لاہور میں “ستھرا پنجاب” پروگرام کی کارکردگی اور صوبے میں صفائی کی صورتحال کا تفصیلی جائزہ لینے کے لیے ایک اعلیٰ سطح کا اجلاس منعقد ہوا، جس کی صدارت وزیراعلیٰ پنجاب مریم نواز شریف نے کی۔ اجلاس کے دوران ورکرز کے حقوق کے تحفظ اور ان کی مالی مشکلات کو مدنظر رکھتے ہوئے اہم فیصلے کیے گئے۔
وزیراعلیٰ پنجاب نے ہدایت جاری کی ہے کہ “ستھرا پنجاب” پروگرام کے تمام ورکرز کو ہر ماہ کی 5 تاریخ تک تنخواہوں کی بروقت ادائیگی ہر صورت یقینی بنائی جائے۔ اس عمل کی شفافیت برقرار رکھنے کے لیے متعلقہ کمپنیوں سے ماہانہ رپورٹ بھی طلب کر لی گئی ہے۔ مریم نواز نے تنخواہوں میں تاخیر کا سخت نوٹس لینے کا حکم دیتے ہوئے کنٹریکٹرز کے تمام بقایا جات بھی جلد از جلد ادا کرنے کی ہدایت کی۔
اجلاس میں صوبے بھر میں صفائی کے نظام کو جدید اور فعال بنانے کے لیے درج ذیل اہم احکامات جاری کیے گئے:
وقت کی پابندی اور شاہراہوں کی صفائی: تمام مرکزی سڑکوں اور شاہراہوں کی دھلائی اور صفائی کا کام روزانہ صبح 5 بجے سے شروع کرنے کا حکم دیا گیا۔
متعلقہ پوسٹس
تجارتی مراکز اور خالی پلاٹ: تمام مارکیٹوں میں یکساں ڈسٹ بنز اور گاربیج بیگز کے استعمال کو لازم قرار دیا گیا ہے، جبکہ تجارتی مراکز سے کوڑا اٹھانے کے لیے مخصوص اوقات مقرر کیے جائیں گے۔ خالی پلاٹوں کو صاف کرنے اور گھر گھر سے کوڑا جمع کرنے کا نظام فوری نافذ کرنے کی تاکید کی گئی۔
پبلک سائٹس کی دیکھ بھال: تعلیمی اداروں، ہسپتالوں، ریلوے ٹریکس، پارکوں، منڈیوں اور شہر کے داخل و خروج کے راستوں پر صفائی کے اعلیٰ معیار کی ہدایت کی گئی۔
گاڑیوں اور پوائنٹس کی دھلائی: ویسٹ مینجمنٹ کی گاڑیوں، کنٹینرز اور ویسٹ پوائنٹس کو باقاعدگی سے دھونے کا حکم دیا گیا۔
انتظامی رابطہ: تمام ڈپٹی کمشنرز کو ہدایت کی گئی ہے کہ وہ کنٹریکٹرز اور واسا کے ایم ڈیز کے ساتھ مسلسل رابطے میں رہیں اور فیلڈ مانیٹرنگ کے نظام کو مزید مضبوط بنائیں۔