وزیراعلیٰ بلوچستان کا کوئٹہ میں شاہراہوں کی بندش کا نوٹس، ٹریفک بحال کرنے کی ہدایت
متعلقہ پوسٹس
کوئٹہ: وزیراعلیٰ بلوچستان میر سرفراز بگٹی نے سیکیورٹی ڈرل کے باعث کوئٹہ شہر کی مختلف اہم شاہراہوں کی بندش کا نوٹس لیتے ہوئے متعلقہ حکام کو فوری اقدامات کی ہدایت کر دی۔
وزیراعلیٰ کی ہدایت پر متعدد اہم شاہراہیں ٹریفک کے لیے دوبارہ کھول دی گئیں، جبکہ متعلقہ اداروں کو ہدایت کی گئی ہے کہ سیکیورٹی انتظامات کے ساتھ ساتھ شہریوں کی آمدورفت میں غیر ضروری رکاوٹ نہ آنے دی جائے۔
میر سرفراز بگٹی نے کہا کہ شہریوں کی سہولت حکومت کی اولین ترجیح ہے، عوام کو بلاوجہ مشکلات کا سامنا نہیں کرنا چاہیے۔ انہوں نے ہدایت کی کہ آئندہ سیکیورٹی اقدامات کے دوران ٹریفک کی روانی برقرار رکھنے کے لیے مؤثر حکمت عملی اختیار کی جائے۔
وزیراعلیٰ بلوچستان کا کہنا تھا کہ سیکیورٹی ضروریات اور عوامی سہولت کے درمیان توازن برقرار رکھا جائے تاکہ شہریوں کی روزمرہ زندگی کم سے کم متاثر ہو۔