عوام کو پرامن اور محفوظ ماحول فراہم کرنا حکومت کی ترجیح ہے، وزیراعلیٰ بلوچستان
وزیراعلیٰ بلوچستان میر سرفراز بگٹی کی زیر صدارت جشن آزادی کی تقریبات کی تیاریوں سے متعلق اعلیٰ سطح کا اجلاس منعقد ہوا، جس میں کور کمانڈر بلوچستان لیفٹیننٹ جنرل راحت نسیم احمد خان نے خصوصی شرکت کی۔
اجلاس میں فیصلہ کیا گیا کہ بلوچستان کے تمام ڈویژنل اور ضلعی ہیڈکوارٹرز میں جشن آزادی کی تقریبات قومی جذبے اور جوش و خروش کے ساتھ منعقد کی جائیں گی۔
وزیراعلیٰ بلوچستان نے تمام ضلعی انتظامیہ اور متعلقہ اداروں کو ہدایت کی کہ جشن آزادی کی تقریبات کو شایان شان، منظم اور یادگار انداز میں منعقد کرنے کے لیے جامع انتظامات مکمل کیے جائیں۔
متعلقہ پوسٹس
اجلاس میں صوبہ بھر میں قومی پرچم کشائی، ملی نغموں، ثقافتی پروگراموں، تعلیمی سرگرمیوں اور عوامی تقریبات کے انعقاد کے لیے تیاریوں کا جائزہ لیا گیا۔
میر سرفراز بگٹی نے کہا کہ جشن آزادی قومی اتحاد، یکجہتی اور ملک کے لیے قربانیاں دینے والے شہداء کو خراج عقیدت پیش کرنے کا دن ہے۔ انہوں نے کہا کہ تقریبات کے دوران عوام کو پرامن، محفوظ اور خوشگوار ماحول فراہم کرنا حکومت کی اولین ترجیح ہوگی۔
اجلاس میں اس عزم کا اظہار کیا گیا کہ جشن آزادی کی تقریبات کو بھرپور انداز میں منانے کے لیے تمام ادارے باہمی تعاون کے ساتھ اقدامات کریں گے۔