تہران: چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سرکاری دورے پر تہران پہنچ گئے ہیں، جہاں ایران اور مکہ دفاعی معاہدے میں شامل پاکستان، سعودی عرب اور ترکیہ کے درمیان علاقائی سلامتی پر مذاکرات طے ہیں۔
پاک فوج کے شعبہ تعلقات عامہ نے ان کے سرکاری دورۂ ایران کی تصدیق کی ہے، جبکہ ایرانی سرکاری میڈیا کے مطابق وہ پیر کو تہران پہنچے۔
مذاکرات میں پاکستان کی نمائندگی فیلڈ مارشل عاصم منیر، سعودی عرب کی نمائندگی وزیر دفاع شہزادہ خالد بن سلمان اور ترکیہ کی نمائندگی انٹیلی جنس چیف ابراہیم قالن کریں گے۔
ایرانی وزارت خارجہ کے ترجمان اسماعیل بقائی کے مطابق چار ملکی اجلاس کی تجویز فیلڈ مارشل عاصم منیر نے اپنے گزشتہ دورۂ ایران کے دوران پیش کی تھی، جسے ایرانی حکام نے قبول کرلیا۔ انہوں نے کہا کہ بات چیت کا مقصد خطے میں کشیدگی کم کرنے کے امکانات تلاش کرنا ہے۔
بقائی کے مطابق اجلاس میں اسرائیلی پالیسیوں، لبنان کی صورتحال اور ایران کے خلاف امریکی و اسرائیلی فوجی کارروائیوں کے علاقائی اثرات پر گفتگو ہوگی۔
پاکستان، سعودی عرب اور ترکیہ نے اگست میں مکہ مشترکہ دفاعی معاہدے پر دستخط کیے تھے۔ اس کے تحت کسی ایک رکن ملک پر مسلح حملہ تینوں ممالک پر حملہ تصور کیا جائے گا۔
اکتوبر کے آغاز میں ریاض میں ہونے والے اجلاس میں رکن ممالک نے سعودی عرب میں فوجی دستوں اور دفاعی صلاحیتوں کی تیز رفتار تعیناتی کے انتظامات پر بھی اتفاق کیا تھا۔