زیارت پولیس حملہ: بلوچستان ہائیکورٹ کا بڑا ایکشن، کون سے بڑے نام لپیٹ میں آنے والے ہیں؟
کوئٹہ: بلوچستان ہائیکورٹ نے زیارت میں پولیس پر ہونے والے ہولناک دہشت گرد حملے کی شفاف اور تفصیلی تحقیقات کے لیے ایک اعلیٰ سطحی انکوائری کمیشن قائم کر دیا ہے، جس کا سربراہ جسٹس محمد ہاشم خان کاکڑ کو مقرر کیا گیا ہے۔
متعلقہ پوسٹس
بلوچستان ٹربیونل آف انکوائریز آرڈیننس 1969 کے تحت تشکیل دیا گیا یہ کمیشن زیارت میں ڈی آئی جی آفس کے قریب پیش آنے والے واقعے کے تمام پہلوؤں کا بریک ڈاؤن کرے گا۔ تحقیقاتی ٹیم کو سیکیورٹی خامیوں، ڈیوٹی پر مامور اہلکاروں کی غفلت اور حملے کے وقت نفری کی موجودگی سمیت تمام انتظامی و سیکیورٹی پہلوؤں کا تعاقب کرنے کے وسیع اختیارات دیے گئے ہیں۔ کمیشن اخبارات، سوشل میڈیا رپورٹس اور عوام سے حاصل کردہ شواہد کا بھی باریک بینی سے جائزہ لے گا، جبکہ کسی بھی متعلقہ افسر یا شخص کو طلب کر کے اس کا بیان قلمبند کر سکے گا۔
یاد رہے کہ زیارت میں پولیس چوکی پر ہونے والے اس دلخراش حملے میں دو ایس ایچ اوز سمیت متعدد پولیس اہلکار جامِ شہادت نوش کر گئے تھے۔ کمیشن اپنی حتمی رپورٹ میں ذمہ داران کا تعین کرنے کے ساتھ ساتھ آئندہ ایسے واقعات کی روک تھام کے لیے اہم سفارشات پیش کرے گا۔