علی حسن زہری کو اختر مینگل کی کس بات پر تکلیف ہوئی؟ ساجد ترین کا میڈیا کے سامنے تند و تیز سوال
کوئٹہ: بلوچستان نیشنل پارٹی (بی این پی) کے رہنما اور رکنِ بلوچستان اسمبلی ساجد ترین ایڈووکیٹ نے علی حسن زہری کے حال ہی میں دیے گئے بیان پر شدید اور تند و تیز ردعمل کا اظہار کرتے ہوئے کہا ہے کہ وہ سرے سے یہ جانتے ہی نہیں کہ علی حسن زہری کون ہیں، کہاں سے نازل ہوئے ہیں اور ان کا تعلق کس سیاسی یا عوامی حلقے سے ہے۔
میڈیا سے گفتگو کرتے ہوئے ساجد ترین ایڈووکیٹ نے سخت لہجہ اختیار کرتے ہوئے کہا کہ انہیں سمجھ نہیں آ رہا کہ علی حسن زہری کو سردار اختر جان مینگل کے کس بیان سے اتنی تکلیف پہنچی ہے۔ انہوں نے کہا کہ بی این پی اپنے اصولی موقف پر قائم ہے اور اس طرح کی باتوں سے پیچھے نہیں ہٹے گی۔
ساجد ترین ایڈووکیٹ نے اپنے بیان میں مزید کہا کہ اسٹیبلشمنٹ کو چاہیے کہ وہ علی حسن زہری جیسے اپنے تنخواہ دار لوگوں کو لگام دے تاکہ سیاسی فضا مزید مکدر نہ ہو۔ ان کے اس سخت موقف کے بعد صوبائی سیاست میں لفظی جنگ اور تناؤ مزید بڑھ گیا ہے۔