ای پاسپورٹ سہولیات کا دائرہ کار وسیع کرنے کا فیصلہ
حکومتِ پاکستان نے بیرونِ ملک مقیم پاکستانیوں کی آسانیاں فراہم کرنے کے لیے ایک اور بڑا قدم اٹھاتے ہوئے ای پاسپورٹ سہولیات میں توسیع کے منصوبے پر کام تیز کر دیا ہے۔ اس اقدام کا مقصد اوورسیز شہریوں کو جدید، شفاف اور سریع الر رفتار پاسپورٹ خدمات کی فراہمی کو یقینی بنانا ہے۔
اس سلسلئے میں ڈائریکٹر جنرل امیگریشن اینڈ پاسپورٹس، محمد علی رندھاوا کی زیرِ صدارت اعلیٰ حکام کا ایک اہم اجلاس منعقد ہوا، جس میں محکمے کے مختلف شعبہ جات کی کارکردگی اور جاری ترقیاتی منصوبوں پر تفصیلی غور کیا گیا۔
اجلاس کے دوران بیرونِ ملک مقیم شہریوں کے لیے ای پاسپورٹ کی فراہمی کو مزید آسان بنانے اور موجودہ عمل کو زیادہ مؤثر و شہری دوست بنانے کے لیے متعدد تجاویز کا جائزہ لیا گیا۔ حکام نے بتایا کہ ای پاسپورٹس میں بین الاقوامی معیار کا جدید سیکیورٹی نظام شامل کیا گیا ہے جو جعلی دستاویزات کے تدارک میں اہم کردار ادا کرے گا۔
ڈی جی امیگریشن محمد علی رندھاوا نے ہدایت کی کہ پاسپورٹ کے پورے نظام کو جدید ترین ڈیجیٹل لائنز پر استوار کیا جائے اور قانونی و پالیسی سطح پر ضروری اصلاحات کو جلد مکمل کیا جائے۔ انہوں نے افسران کو مقررہ وقت کے اندر تمام اہداف مکمل کرنے کی سخت تاکید کی۔
حکومتی ذرائع کے مطابق، ای پاسپورٹ کے دائرہ کار میں اس توسیع سے بیرونِ ملک مقیم لاکھوں پاکستانیوں کو سفارت خانوں اور قونصلیٹ کے چکروں سے نجات ملے گی اور پاسپورٹ کا حصول انتہائی آسان ہو جائے گا۔