پشاور: خیبر پختونخوا کے اضلاع جنوبی وزیرستان اور دیر میں سیکیورٹی فورسز نے مؤثر اور بروقت کارروائی کرتے ہوئے فتنۃ الخوارج سے تعلق رکھنے والے 10 دہشت گردوں کو جہنم واصل کر دیا۔ پاک فوج کے شعبہ تعلقات عامہ (آئی ایس پی آر) کے مطابق، یہ تمام عناصر بھارتی سرپرستی میں خطے کا امن تباہ کرنے اور دہشت گردانہ کارروائیوں میں ملوث تھے۔
آئی ایس پی آر کے مطابق، پہلی کارروائی 6 اگست کو جنوبی وزیرستان کے علاقے اعظم ورسک میں پیش آئی جہاں خوارجی عناصر نے سیکیورٹی فورسز کی چیک پوسٹوں کو نشانہ بنانے کی ناکام کوشش کی۔ فورسز کی شدید اور بروقت جوابی فائرنگ کے نتیجے میں 8 دہشت گرد موقع پر ہی مارے گئے۔ دوسری جانب، ضلع دیر میں کی گئی ایک اور کامیابی سے ہمکنار کارروائی میں مزید 2 خوارجی ہلاک ہوئے۔ ہلاک شدگان کے قبضے سے بھاری مقدار میں جدید اسلحہ اور گولہ بارود برآمد کر لیا گیا ہے۔
متعلقہ پوسٹس
ترجمان کے مطابق، علاقوں کو دہشت گردوں سے مکمل پاک کرنے کے لیے سرچ اور کلیئرنس آپریشنز اب بھی جاری ہیں۔ یہ کارروائیاں وفاقی ایپکس کمیٹی کے تحت اور “عزمِ استحکام” وژن کے مطابق غیر ملکی حمایت یافتہ دہشت گردی کے مکمل قلع قمع کے لیے جاری رکھی جائیں گی۔
صدرِ مملکت آصف علی زرداری اور وزیراعظم شہباز شریف نے فورسز کی پیشہ ورانہ مہارت اور جرات کو زبردست خراجِ تحسین پیش کیا ہے۔ حکمرانوں کا کہنا تھا کہ بھارتی سرپرستی میں پلنے والے دہشت گردوں کے ناپاک عزائم کبھی کامیاب نہیں ہوں گے اور پوری قوم اپنے بہادر جوانوں کے شانہ بشانہ کھڑی ہے۔