سام سنگ کے ایک بڑے فولڈ ایبل ٹیبلٹ پر کام کرنے کی اطلاعات سامنے آئی ہیں، جس کی اسکرین کھولنے پر 17 انچ جبکہ فولڈ کرنے کے بعد تقریباً 8 انچ ہوسکتی ہے۔
رپورٹ کے مطابق ڈیوائس کے ڈیزائن سے متعلق دو امکانات زیرِ بحث ہیں۔ پہلے ڈیزائن میں اسکرین باہر کی جانب فولڈ ہوسکتی ہے، جس کا نصف حصہ بند حالت میں استعمال ہوگا۔ دوسرے ممکنہ ڈیزائن میں بڑی اندرونی اسکرین کے ساتھ تقریباً 8 انچ کا الگ کور ڈسپلے دیا جاسکتا ہے۔
باہر کی جانب فولڈ ہونے والی اسکرین کے تحفظ سے متعلق خدشات ہوسکتے ہیں، جبکہ الگ کور ڈسپلے کی صورت میں ڈیوائس کی قیمت بڑھنے کا امکان ہے۔
سام سنگ ڈسپلے مختلف نمائشوں میں بڑی فولڈ ایبل اسکرینز کے نمونے پیش کرچکا ہے۔ تاہم، اس ممکنہ ٹیبلٹ کی حتمی خصوصیات، قیمت اور دستیابی سے متعلق باضابطہ معلومات سامنے نہیں آئیں۔