واشنگٹن: امریکی صدر ڈونلڈ ٹرمپ نے چین میں ہونے والے ایشیا پیسیفک اکنامک کوآپریشن (ایپیک) اجلاس کے موقع پر چینی صدر شی جن پنگ اور روسی صدر ولادیمیر پیوٹن سے ملاقات کی توقع ظاہر کی ہے۔
غیر ملکی خبر رساں ادارے کے مطابق صدر ٹرمپ نے امریکی ریاست فلوریڈا کے شہر ویسٹ پام بیچ میں صحافیوں سے گفتگو کرتے ہوئے کہا کہ آئندہ ہفتے چین میں ہونے والے اجلاس کے دوران دونوں عالمی رہنماؤں سے ملاقات ہوسکتی ہے۔
امریکی صدر کا کہنا تھا کہ ان ملاقاتوں میں ایران کے ساتھ جاری جنگ کے خاتمے، جوہری ہتھیاروں میں کمی اور دیگر اہم بین الاقوامی معاملات پر تبادلہ خیال کا موقع مل سکتا ہے۔
ٹرمپ نے کہا کہ صدر شی جن پنگ اور صدر ولادیمیر پیوٹن کے ساتھ ممکنہ ملاقاتیں اہم ہوں گی اور ان میں عالمی سطح پر درپیش مختلف مسائل پر بات چیت کی جاسکتی ہے۔
انہوں نے جوہری ہتھیاروں کے پھیلاؤ کو روکنے اور تخفیفِ اسلحہ کے معاملات کو بھی ممکنہ مذاکرات کے اہم موضوعات قرار دیا۔
ایران کے ساتھ جنگ ختم کرنے کی کوششیں جاری ہیں، ٹرمپ
ایران کے ساتھ جاری تنازع سے متعلق امریکی صدر نے کہا کہ واشنگٹن جنگ کے خاتمے کے لیے کوششیں کررہا ہے اور اس سلسلے میں پیش رفت ہورہی ہے۔
ٹرمپ نے دعویٰ کیا کہ امریکا ایران پر دباؤ برقرار رکھے ہوئے ہے اور اسی حکمت عملی کے ذریعے تنازع کے خاتمے کی کوشش کی جارہی ہے۔
تاہم امریکی صدر نے چینی اور روسی صدور کے ساتھ ملاقاتوں کی حتمی تاریخ، شیڈول یا ممکنہ مذاکرات کی تفصیلات فراہم نہیں کیں۔
مجوزہ ملاقاتوں کے انعقاد اور ان میں ایران سے متعلق کسی ممکنہ پیش رفت کا انحصار آئندہ سفارتی رابطوں پر ہوگا۔