شارجہ: افغانستان کے لیگ اسپنر راشد خان مینز ٹی ٹوئنٹی انٹرنیشنل کرکٹ میں 200 وکٹیں حاصل کرنے والے دنیا کے پہلے بولر بن گئے۔
انہوں نے یہ اعزاز 29 اکتوبر کو شارجہ کرکٹ اسٹیڈیم میں زمبابوے کے خلاف دوسرے ٹی ٹوئنٹی میچ کے دوران حاصل کیا۔ راشد خان نے زمبابوے کے وکٹ کیپر بیٹر تادیواناشے مارومانی کو 2 رنز پر ایل بی ڈبلیو کرکے اپنی 200 وکٹیں مکمل کیں۔
ٹی ٹوئنٹی انٹرنیشنل میں سب سے زیادہ وکٹیں لینے والے مرد بولرز کی فہرست میں انگلینڈ کے عادل رشید 171 وکٹوں کے ساتھ دوسرے نمبر پر ہیں۔ ہانگ کانگ کے احسان خان اور نیوزی لینڈ کے ایش سوڈھی کی وکٹوں کی تعداد 165، 165 ہے۔
اس میچ میں افغانستان نے پہلے بیٹنگ کرتے ہوئے 7 وکٹوں پر 221 رنز بنائے۔ جواب میں زمبابوے کی ٹیم مقررہ 20 اوورز میں 5 وکٹوں پر 202 رنز بنا سکی۔
افغانستان نے 19 رنز سے کامیابی حاصل کرکے تین میچوں کی سیریز میں 2-0 کی فیصلہ کن برتری حاصل کرلی۔