کوئٹہ: کوئٹہ پولیس نے اے ٹی ایم فراڈ میں مبینہ طور پر ملوث تین رکنی گروہ کو گرفتار کرکے ملزمان کے قبضے سے 45 اے ٹی ایم کارڈز، پانچ لاکھ روپے نقدی، تین موبائل فونز اور جعلی نمبر پلیٹس والی گاڑی برآمد کرلی۔
پولیس کے مطابق یہ کارروائی ڈپٹی انسپکٹر جنرل آف پولیس کوئٹہ عمران شوکت اور ایس ایس پی آپریشنز کوئٹہ ضیاء الحق مندوخیل کی خصوصی ہدایات پر مالی جرائم میں ملوث عناصر کے خلاف جاری اقدامات کے تحت کی گئی۔
گرفتار ملزمان کی شناخت غلام محمد، ذوالفقار اور عارف علی کے ناموں سے ہوئی ہے۔ پولیس کا کہنا ہے کہ تینوں ملزمان کا تعلق سندھ کے شہر حیدرآباد سے بتایا جاتا ہے اور ان کے خلاف کوئٹہ کے مختلف تھانوں میں فراڈ کے مقدمات پہلے سے درج ہیں۔
کارروائی کے دوران پولیس نے ملزمان کے قبضے سے مختلف بینکوں کے 45 اے ٹی ایم کارڈز، پانچ لاکھ روپے نقد رقم اور تین موبائل فونز تحویل میں لیے۔ اس کے علاوہ ایک ٹویوٹا آلٹو گاڑی بھی برآمد کی گئی، جس پر مبینہ طور پر سرکاری اور سندھ ہائی کورٹ کے وکیل سے منسوب جعلی نمبر پلیٹس نصب تھیں۔
پولیس کے مطابق ابتدائی تفتیش میں یہ بات سامنے آئی ہے کہ گرفتار ملزمان مبینہ طور پر گزشتہ 12 سال سے اے ٹی ایم فراڈ کی سرگرمیوں میں ملوث رہے ہیں۔ تاہم اس طویل عرصے کے دوران ہونے والی وارداتوں اور متاثرہ افراد کی مکمل تعداد سے متعلق مزید تحقیقات جاری ہیں۔
حکام کا کہنا ہے کہ گرفتار ملزمان کا تعلق نیشنل سائبر کرائم انویسٹی گیشن ایجنسی (این سی سی آئی اے) کی 30 سے زائد زیرِ تفتیش انکوائریوں سے بھی بتایا جارہا ہے۔ تفتیشی ادارے ان مقدمات اور انکوائریوں میں ملزمان کے ممکنہ کردار کا جائزہ لے رہے ہیں۔
پولیس نے بتایا کہ ملزمان سے برآمد ہونے والے اے ٹی ایم کارڈز اور موبائل فونز کی جانچ کے ساتھ دیگر شواہد بھی جمع کیے جارہے ہیں تاکہ مبینہ فراڈ کی وارداتوں کی نوعیت اور ممکنہ طور پر متاثر ہونے والے افراد کے بارے میں مزید معلومات حاصل کی جاسکیں۔
گرفتار افراد سے مزید تفتیش جاری ہے، جبکہ پولیس نے اضافی شواہد اور ممکنہ برآمدگیوں کے لیے کارروائیاں جاری رکھنے کا بھی بتایا ہے۔ ملزمان کے خلاف عائد الزامات کی حتمی قانونی حیثیت کا تعین تفتیش اور عدالتی کارروائی کے بعد ہوگا۔
