کوئٹہ میں ہنگامی بیٹھک: برطانیہ اور بلوچستان میں بڑا اتحاد، کیا صوبے کی تقدیر بدلنے والی ہے؟
کوئٹہ: وزیراعلیٰ بلوچستان میر سرفراز بگٹی سے پاکستان میں برطانیہ کی ہائی کمشنر مس جین میریٹ نے ملاقات کی، جس میں باہمی دلچسپی کے امور، دوطرفہ تعلقات اور بلوچستان میں ترقیاتی تعاون کے فروغ پر تفصیلی تبادلہ خیال کیا گیا۔
ملاقات کے دوران تعلیم، صحت، گورننس، سرمایہ کاری اور عوامی فلاح کے مختلف شعبوں میں تعاون کے امکانات کا جائزہ لیا گیا، جبکہ بلوچستان میں جاری ترقیاتی منصوبوں اور اصلاحاتی اقدامات پر بھی گفتگو ہوئی۔
وزیراعلیٰ میر سرفراز بگٹی نے برطانوی ہائی کمشنر کو صوبے میں جاری اصلاحات، عوامی خدمات کی بہتری اور ترقیاتی منصوبوں سے آگاہ کرتے ہوئے کہا کہ بلوچستان میں امن، پائیدار ترقی اور عوامی فلاح حکومت کی اولین ترجیحات ہیں۔
انہوں نے کہا کہ حکومت بین الاقوامی شراکت داروں کے تعاون سے بلوچستان میں ترقی، سرمایہ کاری اور خوشحالی کے نئے مواقع پیدا کرنے کے لیے عملی اقدامات کر رہی ہے۔
اس موقع پر دونوں فریقوں نے باہمی تعاون کو مزید مضبوط بنانے اور مختلف شعبوں میں شراکت داری کو وسعت دینے کے عزم کا اظہار کیا۔