دلخراش سانحہ، معمولی تکرار پر باپ اور بیٹے کی فائرنگ
خاندانی رشتوں کے تقدس کو پامال کرنے والے دو دل دہلا دینے والے واقعات میں سوات اور لاہور میں باپ بیٹے کا خون بہہ گیا۔ سوات کے علاقے کبل میں مبینہ طور پر منشیات کے عادی بیٹے اور باپ کے درمیان تلخ کلامی خونی تصادم میں بدل گئی، جہاں دونوں فریقین کی فائرنگ کے نتیجے میں باپ اور بیٹا دونوں موقع پر ہی جاں بحق ہو گئے۔
دوسری جانب لاہور کے علاقے شالیمار میں جائیداد سے عاق کیے جانے پر ایک اور ہولناک واقعہ پیش آیا، جہاں بیٹے محمد اسماعیل خان نے طیش میں آ کر اپنے ہی والد محمد یوسف خان کو فائرنگ کر کے موت کے گھاٹ اتار دیا۔ پولیس اور ڈولفن اسکواڈ نے بروقت کارروائی کرتے ہوئے ملزم کو آلہ قتل سمیت دبوچ لیا، جبکہ دونوں شہروں میں پولیس نے مقدمات درج کر کے اندوہناک واقعے کی گہرائی سے تفتیش شروع کر دی ہے۔