پاکستان کی معیشت کیلئے بڑی خوشخبری
اسلام آباد: وزیراعظم کے مشیر برائے خزانہ خرم شہزاد نے کہا ہے کہ مالی سال 2025-26 کے دوران نجی شعبے کو 11.38 کھرب روپے کے قرضے فراہم کیے گئے، جو گزشتہ چار برس کی بلند ترین سطح ہے۔
خرم شہزاد کے مطابق گزشتہ مالی سال نجی شعبے کو دیے گئے قرضوں میں تقریباً 15 فیصد اضافہ ریکارڈ کیا گیا، جو کاروباری سرگرمیوں اور سرمایہ کاری میں بہتری کی نشاندہی کرتا ہے۔
انہوں نے بتایا کہ نئے قرضوں کا 89 فیصد حصہ مینوفیکچرنگ، تھوک و پرچون تجارت اور زراعت جیسے اہم شعبوں کو فراہم کیا گیا تاکہ معیشت کی پیداواری صلاحیت کو مزید مستحکم کیا جا سکے۔
ان کا کہنا تھا کہ صرف مینوفیکچرنگ سیکٹر کو 657 ارب روپے کے نئے قرضے دیے گئے، جو صنعتی سرگرمیوں اور پیداواری استعداد میں اضافے کی عکاسی کرتے ہیں۔
خرم شہزاد نے مزید کہا کہ تجارت اور زراعت کے شعبوں کو مالی معاونت سے پیداوار، کاروباری سرگرمیوں، نجی سرمایہ کاری اور مجموعی معاشی استحکام کو فروغ ملا ہے، جبکہ نجی شعبے کو بڑھتے ہوئے قرضے کاروباری اعتماد میں اضافے کا مثبت اشارہ ہیں۔