بی این پی رہنما کے بھائی کا سرِعام بے رحمانہ قتل، شہر میں ہنگامی صورتحال، اہم شاہراہ بند
کوئٹہ (نمائندہ خصوصی): صوبائی دارالحکومت کوئٹہ کا ویسٹرن بائی پاس اس وقت میدانِ جنگ بن گیا جب سردار کے مقام پر نامعلوم مسلح افراد نے اندھا دھند فائرنگ کر کے ایک شخص کو موت کے گھاٹ اتار دیا۔
پولیس ذرائع کے مطابق، جاں بحق ہونے والے شخص کی شناخت محمد عارف مینگل کے نام سے ہوئی ہے، جو بلوچستان نیشنل پارٹی (BNP) کے معروف رہنما لالہ غفار مینگل کے سگے بھائی تھے۔ واقعے کی اطلاع جنگل میں آگ کی طرح پھیلتے ہی علاقے میں شدید کشیدگی اور خوف و ہراس پھیل گیا۔
متعلقہ پوسٹس
خونیں واردات کے خلاف مقتول کے لواحقین اور بی این پی کے کارکنان نے شدید احتجاج کرتے ہوئے ویسٹرن بائی پاس روڈ کو ہر قسم کی ٹریفک کے لیے مکمل طور پر بند کر دیا۔ سڑک بلاک ہونے کے باعث گاڑیوں کی لمبی قطاریں لگ گئیں اور شہر کا اہم ترین مواصلاتی رابطہ معطل ہو کر رہ گیا ہے۔ مظاہرین کا مطالبہ ہے کہ قاتلوں کو فوری گرفتار کر کے کیفرِ کردار تک پہنچایا جائے۔ پولیس کی بھاری نفری نے موقع پر پہنچ کر تحقیقات کا آغاز کر دیا ہے، تاہم اب تک کوئی گرفتاری عمل میں نہیں آسکی۔